良辰美景

　　　　　　　　　　　　　大浪西灣－渺無人煙
　　　　　　　　　　　　　遠觀沙灘像一彎半月

中秋節翌日假期, 本是郊遊好時光, 可惜親戚到來, 白白浪費了如此良辰美景..... 只怪自己唔爭氣！
要不, 早已置身荒山野嶺了.影下相, 享受郊遊樂趣. 如今, 只能呆在家中上網,看書作娛樂罷!

每個星期天亞視晚上十點有個"香港自然十大勝景" , 由主持ALBERT AU每集邀請一位嘉賓暢談人生, 又訪探香港勝景. 如上星期天播放"大浪西灣". 果然名不虛傳, 秋冬已來, 望隨後有機會相邀友人同訪此自然勝景.　

PS : 上圖COPY FROM 行山網站

中秋佳節

今年中秋佳節, 公司出乎意料之外讓同事們提早3:00下班回家過節, 只見事頭C出電郵通知後, 同事們面上都掛著那種難掩內心歡愉的笑容!

4:00左右, GALS 們差不多全下班了, 只餘下我和三兩同事. 不知是否天意弄人, 居然在此充斥HOLIDAY HOOD 的日子下, 竟不約而同來了生產單和樣辦單共10張! 同事們好心叫我下班,別管那麼多. "唔通唔做咩, 張張都急, 尤其係日本仔客!" 無奈之餘, 只好眼光光望著一個又一個身影走到打卡鐘"卡刷"一聲後離開.

今天中秋佳節, 惜厚雲掩蓋明月, 但無損人們賞月遊燈的熱情, 只是我怕人多, 不如在家一個人過更好, 倚著窗戶, 送來陣陣微風, 吃著友人送我的素食月餅, 呷一口清茶, 遠離煩瑣, 享受月下獨酌的寧靜, 看來也是賞心樂事啊!

你們今年中秋節又到那兒過?

貪嗔癡

有次佛學講座，星雲大師指出人之煩惱，皆因貪嗔癡、不過，像我這類凡夫俗子，怎能全去貪嗔癡？但求不過貪、過嗔、過癡，已算好好。尤其在這個波濤凶湧的金魚缸浮浮沉沉, 只怕有些人未得見到黎明，已於黎明前一刻被蒸發掉，要怨，不要怨股災，只能怨自己過貪、過嗔、過癡。

避世

每年最怕這日子來到. 第一件事就是找個地方避世一會, 或者訓下覺, 實行駝鳥政策.

不過, 仍騙不到時間, 便唯有堆砌籍口自騙欺人! 要是人到中年有番d成就都好, 無奈活到如今, 仍一事無成, 冇學歷冇專業更冇靚樣, 只能在工廠區做一條傻頭傻腦呆呆笨笨的二打六.

唉! 不知道生存何價? 竟然學人在地球生存, 都幾浪費資源啊 !

羌山龍仔大澳行

秋意漸來, 又是開始行山郊遊好時節了. 呢個星期六便相約同事六人放工後入大嶼山, 選了龍仔至大澳路線, 順道訪探已荒廢的龍仔悟園.

到達東涌已是下午兩點幾, 因還要轉巴士上龍仔, 各人只好匆匆忙忙買個飽邊食邊上路.

雖然有行山路線指示, 我還是神經慌張地驚死過左目的地車站, 幸車上得好心人指點, 終如常按路線上指示的那個站下車.

下車後沿著引水道行, 盡是石屎平路. 既沒有開揚景觀, 只偶見山邊小溪 , 頗為沈悶. 行至盡頭, 轉過山腰, 就開始上山路徑了. 上山路程不算斜, 只怪自己小氣, 永遠墮後, 行無耐又話要透下, 唉, 同事們都多得我唔少啦 ....! 幾經"艱難"終行上200多米小山丘. 不久見路牌指示便往萬丈瀑方向行, 沿途隔岸遠觀萬丈瀑, 只覺像一條柔弱的銀絲, 少了昔日那股澎湃. 其後便訪探當地著名既龍仔悟園, 欲感受江南庭園風味. 只是來到門庭冷落, 重門深鎖, 鐵絲欄路, 這片除了長滿雜草, 填滿密密麻麻"荷花葉"的荷花池外, 還有九曲橋和在水中央的小園亭悽清的孤寂佇立. 但不難想像昔日園庭繁華, 荷花滿池的盛景. 忽感想人生本是無常, 命運的有起有落的際遇. 不禁唏噓!

遊畢龍仔悟園後, 見時間不早, 便起行下降至大澳, 但沿路很斜, 看來唔止45度角. 心想好彩我唔係上山, 要不真係中途折返都似! 後來下山後經鹽田仔村, 再走多段路, 便來到大澳.

當晚大家在大澳遊了一圈, 走過新基橋, 既品嘗了當地冰甜豆腐花,也到曾特首"流連再返"的飯店"蓮香酒家" 嘗了一頓好菜, 當是獎勵完成了半天行山旅程.

有誰共鳴

抬頭望星空一片靜, 我獨行 夜雨漸停。無言是此刻的冷靜, 笑問誰, 肝膽照應。
風急風也清, 告知變幻是無定, 未明是我苦笑卻未停。
不信命, 只信雙手去苦拼, 矛盾是無力去暫停。
可會知, 我心裡困倦滿腔, 夜闌靜, 問有誰共鳴?

從前是天真不冷靜,愛自由, 或會忘形。明白是得失總有定, 去或留, 輕鬆對應。
孤單中顫抖, 我知我實在難受, 問誰願意失去了自由?
想退後, 心裡知足我擁有, 前去亦全力去尋求。
風也清, 晚空中我問句星, 夜闌靜, 問有誰共鳴。

這是哥哥早期一首作品, 歌名為"有誰共鳴"。再次細味歌詞內容, 聽後頗有感觸。

人生本是無常, 許多事都是身不由己, 盡是努力, 未必有成果。那倒不如不以物喜，不以己悲，反正人生就是充滿起跌和挑戰、成功或失敗，何嘗不如輕鬆面對，更來得瀟灑自如。

如果沒有情

如果沒有情, 人就變得理性. 可冷看身邊的生離死別, 內心不覺傷感. 人也不再執著.

有樣學樣

我公司名副其實為中國人開辦, 是一盤家族生意. 我老頂事頭k 和他哥哥P 都是繼承父業. K 是崇日一族, 愛向客戶四圍吹噓我們是"日資公司". 說來也是, 要不是那些O架仔俾生意我地, 我地又點會出到糧呀. K 還事事以O架仔為磅樣, 唔駛經大腦諗梗係話O架仔講乜都係道理又有智慧. 又學足九十度鞠躬盡瘁, 死而後已的模樣. 仲要D員工學足O架仔既工作態度. 我心想佢駛唔駛幫公司改個XX株式會社吧. 或索性自己改埋個日本名字.. 例如"K太郎".

個人覺得, 日本人的工作態度既團結, 亦認真. 對事情一絲不苟, 難怪他們的產品有好質量, 予客人信心, 這是值得國人學習. 亦是我欣賞日本人的地方.

只是係咪乜都跟足呢? 記得K一本正經地同我講過一段令我汗流既對話: "日本人俾野我地做, 越係煩, 我地越要不惜一切接來做, 你唔好怕煩, 要做到佢服左我地, 怕左我地為止. 如果日本客約我地晨早六點鐘見面, 我地就要設法比佢早一個鐘到, 寧願我地早到一個鐘好過佢地等我". 我心想問, 如果單生意做衰左, 駛唔駛學埋日本仔剖腹自殺? 或學神風敢死隊一樣下場呢?

最攪野係他還要強調學習日本人一樣, 要是忽然想起某單貨, 就不管如何隨時隨地打電話問個清楚.話說今年復活節假期幾天. 我正在悠閒地遊山玩水之際, 手機響了原來東洋客戶是也，唔知邊個二五仔俾底我手機號呢？O架仔急問”我的貨怎樣了，可按期出貨嗎，你知道這個是不能遲啊！所以我打來問確定吧?"　我亦知道他這單貨很急，故假期前已跟國內廠同事安排了．其後掛斷電話後不久又再打來說沒有收到另一張訂單既invoice , 如是在電話死纏難打一輪, 唉....算了,唯有今晚回家再打多張電郵給他吧. 掛線後心裡以為老定, O架仔要問既都問哂. 唔會再有電話吧.
點知又輪到K打電話給我喎! 唉點會有好野丫. 仲好笑佢問: 你而家係邊呀. 你身邊有冇電腦呀? 我剛見到"蝦記"(某日本公司)有個電郵來, 我唔太理解佢想問乜, 我想同你一邊電話傾, 一邊睇電郵呀." 我當下火都來了, 卻努力抑制怒氣的答: 唔好意思, 我而家係郊外行緊山喎, 呢度慌山野嶺冇電腦呀, 幫唔到你啦." 我差點還想加多句: 下次駛唔駛帶埋個NOTEBOOK一齊行山呀?

短短一個假期上午, 已接來幾個公事電話. 本想在假期找尋寧靜空間, 只怪自己太笨沒關掉手機, 悠閒心情吹散了. 不如公司下年唔好放我地假期囉. 或索性跟日本假期囉. 我唔想我放假期間又有人打來攪亂擋!

你地係老闆, 鐘意學O架仔係你既事. 但我地只係打工仔吧, 冇理由陪你地一齊癲架!


註：日本和國內是沒有復活節假期的

月餅贈客仔

無無聊聊又到中秋節了. 中秋將至 , 意謂距過年不遠矣.

公司每年都送贈月餅及生果籃予客人.本來很平常的但竟然可以攪出個笑話來 :

話說去年同事J送左個果籃俾佢個客, 客人收到後卻發現水果居然是壞. 還有條虫 "絲絲然"從水果鑽出來. 個客冇即時掉去垃圾箱. 反而把果籃裡那些壞水果連那條虫一起拍照電郵給同事J. 話俾佢知: 係咪玩野呀! 贈送多條虫俾我做紀念嗎 ?

幫手

上星期五，收到朋友蔡小姐的電郵邀請，出席九月四日KRISHNA生日會，且有幸委託幫手做當天節慶之指示牌．

第二天趁星期六下午放假就開始著手籌備構思，我不想指示牌太過普通，便撇開用電腦，改用手畫，且配以公仔圖案．希望看來可會新鮮一點．不過可能太耐冇動手畫公仔了，畫起來最初不太順手．畫出來KRISHNA雖是Q版．卻擔心devotees們未必接受．

用鉛筆畫了草圖後，便用黑色粗MARKER綑邊．誰知畫了幾筆，那MARKER墨水已轉淡．遂再拿第二枝，第三枝，第四枝，都是這樣，可能這些筆真係放左好耐．乾左唔出奇．結果在搾無可搾之下，便改用幼小水筆頂住．好不容易，綑邊這個步驟終完成．都攪到成半夜點幾鐘．

到星期日，一早到影印店把原稿複印幾張．再拿回家趕緊填上顏色．我採用漸變由深到淺的方法把顏色填上字體及公仔，看來效果不錯．只是這些從抽屜深處取出久未用過的木顏色筆，彷彿老是不聽話，每次"炮"一次筆，總輕易的斷了，有些"炮"了更填不上顏色．真係炮筆炮到手軟．

我共做了八至九款指示牌，每款有三張．要是一天內把顏色填完，怕未必做完成．幸得茵妹及餅哥當天來我家作客，幫手一起填顏色．最後這些指示牌都終能星期天晚上完成了．星期一可如期交予友人．

我也慶幸devotees 覺得這些指示牌畫得生動有趣．多謝他們的賞識．我畫這些Q版公仔由學生到現在已有十多年了，想不到這種畫法依然可受落，想來也感恩惠．