一潭死水

星期六早上從何太得知, 原來PK DUCK將要被兜, 與一眾同事談論, 大家都顯得有點既驚且喜, 不是PK DUCK被兜, 而是預告到公司行動快要埋身了。

怪不得早兩日PK DUCK 咁好死主動幫手係公司換光管。聽說他還跟公司要求自動減人工希望換取事頭回心轉意, 但公司去意已決, 他現在亡羊補牢, 就算做得幾好睇, 態度點改變, 都是無謂。 他被兜, 其實都是大家意料中事。

公司多個月來財政困難嚴重, 將何去何從? 把寫字樓分拆一半租出去, 還是搬去對面小單位.... 都成為同事之間茶餘飯後的話題。只知牛哥兩公婆主張留守原地, 古惑k及老父支持搬去對面單位。我們打工, 事頭最終如何決定就只有佢地知道, 我只在乎公司準時及俾足糧就可。 雖不排除我也步PK DUCK後塵,  但早已有心理準備。或許這一天真的來臨, 我真的會不捨得, 畢竟我在這裡工作差不多快10年。然而, 舊的不去, 新的不來。這裡已是一潭死水, 是時候借一股浪沖出大海了, 總不能半死不活的慢慢淹沒。

結局相信等待年尾才有揭曉。