唐梁兩邊開波，市民點睇？
深水埗一位攤販檔主的「金句」最能反映民意民心。記者問你支持唐做特首嗎？「支持。」為什麼？「冇呀，我們都無得揀。」阿叔笑笑口，無晴無雨，無青筋暴現無嗌破喉嚨無擲半塊狗餅，臉容比任何高官自然自在。
草民徹底到連垃圾都無得揀，誰上台，都要聽阿爺支笛，都要睇西環臉口決定食粥食飯。還要擺平新界僭建鄉紳惡勢力，跟地產霸商摸底杯酒釋兵權。左中右都有聲大夾惡的人民代表，誰坐正，誰都要做公關，水來土掩。石斑粟米飯預了要硬接，還要懶幽默問對方有無加底，唔該送多件深水埗缽仔糕做飯後甜品。
土炮影帝周星馳撐唐，得啖笑。揀特首，唔使考公開試， day1開始，已經知道，他身不由己，蠢與唔蠢，唔到 TSA評估。唐唐開口，確實像疑似讀寫障礙，泊埋辯才超班的梁振英，必然墊底。近朱者赤，唐營較多星爺類型，執粒糖，輸間廠，騎騎呢呢做人世。對照梁營那邊，埋班者唔少戰鬥格人形，個個都咁鷹，邊有偈傾？民調一面倒 buy梁振英，真的？會不會是一屋七姓十三票的蠱惑翻版？
陳也@ Appledaily
沒有留言:
張貼留言