回家後, 我便開始了坐月生活, 雖然只有短短一個月, 但已讓我苦不堪言. 除盡失自由外, 整天還要遵守鄉下古老奇型怪狀的習俗. 有云坐月對一個剛已生產的婦女十分重要. 老人家常聲稱這個月沒有好好補養足夠, 到老來病痛就一蘿蘿喎!
如何奇型怪狀?
1) 不許洗頭 : 因為頭濕, 將來易有頭痛. 故老習俗稱四十日內不能洗頭. 然而我也懶理咁多, 只能支持到廿日便洗頭了. 只是第一次洗頭先用熱薑水淋頭及洗後馬上用風筒吹乾. 其實以前鄉下沒有風筒, 故怕洗濕頭沒即時乾而怕有頭痛.
2) 洗手,洗面,洗澡都要熱薑水: 又是另一鄉下習俗, 稱薑有驅寒之用. 讓筋骨不會老來有風濕關節痛. 我每天總煲幾次, 把煲好的薑水儲在熱壺裡放在洗手間用.
3) 不能刷牙只能潄口: 這真的有點兒那個, 我接受唔到囉! 又是鄉下講法, 因為怕刷傷影響老來牙齒不夠硬淨喎. 我說如果不刷牙, 什麼蛀牙, 牙週病都出現, 甚至牙齒提前衰老掉落!
4) 產婦不先食飯其他人不准食: 呢個不用說又是來自鄉下, 我聽左直頭O咀. 直頭覺得係荒謬之事! 一位親友聽後登時反應為: 要不要特別給上產婦另外一個飯煲呢?
5) 整天躺床: 這對我而言真是很難! 還要平躺個隻動彈不得, 聲稱對腰骨好喎! 我而家不是在醫院哦! 就算是休息也不用躺在床上睡整天呢! 我一點睡意都沒有. 躺得太久我只覺得腰酸背痛!
6) 獨孤一尾: 因為是開刀生產關係, 食野方面的選擇可真是少之又少, 就是早午晚都是飯, 菜心, 肉丸.豬腰, 食足食個月. 其他一概不能食, 就連薑燥, 活血行血的中藥或有關食材一概不能吃. 我別無他選, 只好頂硬上, 食不下還是要硬著頭皮吃完! 至坐月完畢後, 我發覺味雷已麻木了, 吃別的東西已無味了.
7) 相見好, 同住難: 家中老媽自知難以單刀單槍處理我坐月的起居, 便找來她妹妹來港幫手. 姨媽其實很好, 但我自知難以相處, 與姨媽相處那段時間, 我再一次明白什麼叫做相見好同住難. 有些事我委實頂佢唔順. 例如每次有新訪客來我家, 姨媽老是在我客人前吹噓自己當年坐月有幾勁:
" 我對奶D 奶汁多到兩邊流哂出來, 我個仔飲我D奶都飲唔切, 我放產假放足七個月, 就俾佢飲足人奶咁耐! 係後來個仔大個D 才係咁意開D奶粉俾佢兼下咋! "
" 我個陣坐月時好擦得, 每天固定食一隻雞, 一條魚, 一個豬肚, 每餐還食兩大碗飯 ....., 後來一兩年後奶奶跟我講起, 她是如何驚訝和佩服我的食量, 而且可以餐餐清! "
以上吹噓過一次便算, 可是講完又講的確惹人煩厭. 是在取笑我嗎? 我開始覺得有反感. 最可怕是她是個食肉獸, 無肉不歡. 她每次來港實買來幾只"雞", 難度與雞有仇? 我聽到又帶幾只雞來我登時頭痛. 其實可不可以食素一點呢? 我又想起每次到深圳外婆家, 那邊人總是大魚大肉, 什麼羊, 牛, 雞, 鵝, 豬, 魚..... 擺滿一台, 我看到也吃不下, 因為太恐怖!
還有, 我還記得佢講過: " 利是我不收了. 這次我來幫你手, 下次到我有需要時你也要幫返我手." 這樣又暗示了, 原來佢個仔想要買手機. 就趁個仔考完試帶佢來港. 好的, 今次就成全你吧. 我總算還了個人情. 以後佢個仔話要來港生仔就唔好旨意我!
姨媽還忘了自己是客人身份. 我家裡的事他不宜插咀過問或八卦太多. 該曉得分清主客之分. 所以我就特登談起些事他不知曉時, 好讓她無法嗒嗲. 可是我老媽總要把她看成我家一分子. 過年前姨媽回深圳去, 我才懂得鬆一啖氣. 有時我怕她連做夢都見到. 多恐怖.
隨著二月份的來到我的坐月生活也涯完, 感覺有如雀鳥從籠裡釋放出來. 我的起居飲食終於恢復原來模式. 只是生冷/寒涼食品還未可嚐. 這個月我跟老媽說不用姨媽來, 就趁我上班前讓我負起當媽媽的責任照顧小女兒. 否則愧為人母.
